譚詠麟噚日同樂隊Mr.喺新城做訪問，講到黃秋生用妓女嚟比喻啲o靚模，阿倫反而幫口撐話啲o靚模都係搵啖飯食好凄凉，幕後軍師可以搵其他場所搞簽名會，阿倫仲搞笑提議：「使唔使成立個公會，叫8模會館啦，join埋阿姐個八和。」
阿倫咁講唔怕激嬲阿姐？阿倫笑騎騎話：「關心吓啫。」阿倫又推舉曾志偉做8模會館主席，佢話：「志偉鍾意幫幼弱，最有善心，扶貧無依無靠、冇衫着走嚟走去嘅少女。」
另一邊廂嘅鍾舒漫、古巨基同容祖兒（Joey）等，噚日到銅鑼灣出席英皇新秀歌唱大賽記者會，今次歌唱比賽將會喺網上收集參賽者嘅短片，最後會揀出十強，英皇一姐一哥Joey同基仔仲會擔任地獄教官給予意見。
鍾舒漫書展照簽名
近日o靚模被禁喺書展舉行簽名會，身為歌手嘅鍾舒漫嚟緊都喺書展會出書，書中仲有着三點式嘅泳衣照，但就獲批准搞簽名會。對於黃秋生暗寸o靚模如妓女嘅言論，鍾舒漫好避忌咁話：「咁又唔好咁講，自己都唔方便畀咁多意見，每個人有唔同嘅想法。」
同場嘅基仔就自爆當年佢做緊《娛樂新聞眼》時，試過俾星探喺街上招攬呃錢，佢話：「當時個星探唔認得我，我有上去，仲俾人問攞兩、三萬，最後我死推先甩身，不過我都為曾經有人睇中自己而安慰。」