氣溫日日超過30度，烈日當空，喺戶外工作嘅打工仔最辛苦，又熱又焗仲要暴露太陽底下工作，苦況真係不足為外人道，平日坐喺冷氣間高談闊論嘅議員、高官，噚日都嚐到悶焗滋味。昨日早上11點半左右，立法會財經事務委員會正在開會，忽然間人人眼前一黑，原來又停電。
立法會停電冇冷氣翳焗
點解係又停電呢？皆因立法會大樓去年底因為電力設備老化而停電，之後搵專人檢查維修。噚日停電唔單止搞到烏燈黑火，最恐怖係連冷氣都停埋！需知道天文台已發出酷熱天氣警告，會議室冇冷氣又翳又焗，所以要暫停會議。
停電五分鐘後，立法會啟動後備電源重開燈光，不過仍然冇冷氣，多個議員都叫苦連天。噚日停電同立法會電力系統老化無關，一切只係港燈嘅問題。港燈發言人稱，一條高壓地底電纜喺昨日上午11點半左右故障，影響中環部份客戶供電，其中包括立法會大樓，港燈會調查電纜事故原因。
機電工程署稱未接獲港燈報告事件，亦冇接獲其他用戶報告。據知今次受影響範圍唔大，大部份中環人喺議員、高官焗桑拿期間，仍然可以喺辦公室印印腳嘆冷氣。議員、高官平時一邊享受冷氣，一邊話為民請命、福為民開，八方覺得佢哋講風凉話居多，知道多少民間疾苦成疑，噚日停電冇冷氣，可能令佢哋體會到戶外工作打工仔之苦。
日前有個小巴司機不幸熱到死，被指同停車熄匙措施有關，工會、運輸業界都指停車熄匙係惡法，一旦通過條例，唔知有幾多打工仔受苦，成為下一個犧牲者。有工會人士批評，高官坐在凉浸浸冷氣房，出入有冷氣車，又點會理解大熱天時唔開冷氣嘅車廂形同焗爐嘅滋味？
為咗令負責此事嘅環境局局長邱騰華試吓坐入焗爐滋味，立法會議員擬在大暑當日，即係今個月23號請局長落區，實地了解司機苦況，只講環保風凉話，遲到又累死人，八方聽聞有工會密謀拉倒停車熄匙惡法，能否成事拭目以待。
mailto:[email protected]