世界盃決賽越嚟越精采，唔少好似小妹咁鍾意嘈生晒、同朋友攞住酒杯飲啤酒睇波嘅，都會揀去酒吧睇波。呢排一開波都旺晒場嘅蘭桂坊，為咗延續人氣，今個月中會搞第七屆啤酒節，除咗引入世界各地過百款啤酒之外，仲會舉行啤酒節小姐「MissBeerfest」選舉，等大家睇完世界盃之後仲有理由繼續蒲吧。
試飲過百款各地啤酒
蘭桂坊喺7月17、18日大搞嘅啤酒節，主題係「炎夏中的綠洲」，準備咗過百款嚟自德國、愛爾蘭同比利時等地嘅啤酒，咁就算好似呢幾日熱到暈，一樣可以飲吓冰凉啤酒消暑，仲會有六位身材惹火嘅美女參加啤酒節小姐選舉，等大家眼睛都可以食吓冰淇淋，再用掌聲投票選出心目中嘅冠軍。
小妹對超過60個美食、啤酒以及互動遊戲攤位興趣比較大，據講啤酒節仲會舉行勁飲勁食同拗手瓜大賽，贏咗可以獲贈餐飲禮券。蘭桂坊協會主席盛智文噚日喺記者會上同小妹講，由於有大批睇波客幫襯，令蘭桂坊今年生意到家已經增長兩成，佢笑騎騎咁話：「年年都有世界盃就好啦！」
電郵：mailto:[email protected]