世界盃鬥到八強，場場波開波前，兩隊球員都會齊齊拉起「向種族主義說不」橫額，影番張大合照，宣揚種族平等。咪以為只係做個樣，足球確實可以打破種族仇恨，蘭桂坊之父盛智文就係最佳例證。
盛智文本身係猶太人，卻係德國躉，見到德國隊在世界盃越打越順，滴酒不沾嘅佢一樣high到爆。佢同八方講，由於喺德國出生同接受教育，好欣賞德國人做事注意細節講求紀律，今屆德國隊正正發揮到呢啲民族優點，落場有前有後，捧硬盃咁話喎！講到德國擁躉，八方又諗起已故足球評述員阿叔林尚義，如果德國隊成功捧盃，相信阿叔喺另一個世界同樣high爆。