03年7.1，阿金與Clara第一次上街。Clara說：「我喺美國讀書，97年後返香港，對呢度發生嘅事唔熟悉，冇乜參與公民運動。直到政府要就23條立法，覺得好唔合理，第一次參加遊行。」自此，她和阿金幾乎每年7.1都上街。兩口子都是藝術工作者，阿金在大學讀社工，對時事比較敏感，對不公義事情比較看不過眼。
扮鬼扮馬 開創先河
04年7.1，阿金與Clara訂婚，二人穿起中式結婚禮服遊行，沿途接受群眾祝賀，記者爭相採訪。阿金說：「嗰年經濟仲未完全復蘇，大圍氣氛低迷，自己嘅工作又冇乜突破。我哋就諗，不如冲喜一吓，唔使個個皺晒眉咁。」那年的7.1遊行沒有現在般多花樣，這樣一對打扮獨特的情侶，算是為往後的嘉年華式7.1遊行開創了先河。
05年7.1，董建華下台了，遊行人數銳減，只有2.1萬零兩個香港人堅持下去，包括阿金和Clara。那年他們倆背着結婚裙褂的紙板上街，Clara說：「我哋覺得04年嘅訴求，05年仲未得到回應，好多政制同民生問題都未解決，所以就背負住04嘅陰影上街。」阿金說並非馬後炮，他當年已認定曾蔭權不是好貨色，事關他在老董下台後吹住口哨返政府總部的嘴臉，很不討好。
訴求太多 力量分散
06年7.1，藝術家夫婦暫別街頭。阿金：「嗰年老婆大肚，冇遊行，淨係搞咗個展覽，將我哋嘅遊行片段展示出來，同大家一齊回憶過去幾年嘅心路。」
07年7.1，回歸10年，重出江湖。這次他們推着嬰兒車帶女兒上街，第一次懷着民主訴求薪火相傳的心願。Clara說：「我哋冇特別同囡囡講解遊行意義，只係帶佢出來感受一下，等佢大個咗自己選擇。」阿金記得，大約是那年起，7.1遊行變得像個嘉年華，更多團體、更多訴求、更多人像他們一樣扮鬼扮馬：「其實咁樣唔係幾好，訴求太多，力量分散，爭取普選嘅意願就模糊咗。」
上街10年 心態轉變
08年7.1，他們孭起夫妻的透明剪影人板遊行，諷刺政府不理民意，當人民透明。「嗰年都幾灰，開始諗過唔再上街，年年係咁行究竟爭取到啲乜？」阿金反省自己的7.1路程，但他們始終沒有停下腳步。Clara說，動力來自孩子，以及圈子裏一些憤世嫉俗的藝術家朋友。她說：「我哋鍾意用藝術作品表達政治訴求，不過作用好微好微，仲微過三更半夜爬上政府總部棵古樹。」
09年7.1，又上街。那年他們自製了一輛玩具車，車上是夫妻剪影膠板，由女兒拉着行，象徵下一代推動上一代。阿金說：「呢一年開始，80後力量抬頭，令我諗起60年代美國嘅hippies；係社會環境催生咗一班以唔同形式抗爭嘅青年，佢哋有不可抹煞嘅功能，唔係佢哋，菜園村班村民都冇人理。」
10年7.1，阿金說，他們仨的遊行，已經昇華至一種行為藝術。準確點說，是他們四了﹔Clara懷着六個月大的第二胎上街。今年大遊行，民主黨搶盡風頭。Clara說：「今年嘅感覺特別怪，我哋嘅心態都係唔爭在行埋佢囉。我知道政府最想我哋咁樣諗，所以我要講畀自己聽，唔可以俾呢種諗法保存落去。」
記者 蔡元貴