股票市場光怪陸離都是「錢作怪」，與政治同樣無永遠的對錯，只有永遠的利益，所以凡事即使幾睇唔過眼，你都只會被勸喻唔好理人閒事，幾多財技遊戲無非只是玩經濟學第一課「Demand&Supply」，玩供求。
關鍵就是小股東從來無一條數數得出對家底蘊，你耍盲雞佢玩偷雞，睇穿這個遊戲嘅關鍵隨時可以玩番佢轉頭，但是謹記千萬唔好瞓身，大股東有幾時跟小股東齊歡唱同慶賀，有嘅話玩吓手隨時都係糖衣毒藥。腳踏實地投資嘅時機又未至，小注投機都係只宜輕身上路，香港股市越來越人為，後市隨時「五窮六絕七擔心」。
擔心嘅自然係股票供應越來越多，就好似美國印銀紙，印得多就唔值錢，小秦話過假如佢都撻定個樓市就死得，結果佢真係撻咗定，個樓市就升到顛咗未死得，上帝未見你個樓市瘋狂又點會咁快畀你滅亡。「牛央」又話過農業銀行（1288）首日掛牌一定升，呢個當然係大家嘅願望，不過亦當然係主觀願望；我只可以講，以該行今次上市公開發售部份只佔H股發行總數5%即12.7億股H股而言，即使係每股3.48元上限定價，只要砌夠45億港元，就可以將之通通圍起，佢就想跌都難。不過問題係邊個拿幾十億元出來撐場撐到底，真係要一家大細靠晒呢個HigherAuthority才有運行，唔好忘記唔畀佢跌係一回事，要佢有得升就需要更大銀彈力量。
農行上市升跌都難
還好A股發行價低過H股，明顯係擺好晒安全氣墊，仲要安全到墊高至幾十樓咁高嘅招股價水平，想跌都好難，唔怪得牛央咁口響啦！計我話就算要收集炒供求都搵隻價碼細啲貨源易歸邊。同期上緊另外一隻公開發售股數得1千萬股嘅康宏理財（1019），就算上限每股1.2元定價，脆脆哋1200萬就搞掂晒，起碼想起錨都唔使等咁耐，最關鍵係管理層自己都同小股東搭埋同一條船。
胡孟青
獨立股評人