6.23政改大戰一連三日舉行，最終喺民主黨支持下政府大勝收場；既然冇手尾跟，鬍鬚曾亦都安心出發去到多倫多參與G20峯會。
晒胡錦濤握手照
鬍鬚曾今次係第四次以中國代表團成員身份出席類似國際會議；相對其國家元首同部長，鬍鬚曾只係算個小角色，唔會起眼，但佢都好努力充實旅程，趁機同中央對口單位領導友好一下，包括同人民銀行行長周小川會談，討論香港喺國際環境同不同金融組織所扮演嘅角色。
最重要係佢喺會面期間有機會同胡錦濤主席握手，呢張矜貴握手相仲放咗喺佢嘅網誌上。唔通係向外界表明，盛傳已經無望參加下屆特首跑馬仔嘅自己，其實仲有一線生機？