上星期四講有女讀者傳來英文電郵，話明以後會投票畀劉慧卿，跟住又收到一個男讀者書寫中文來信，話自己在大陸領教過共產黨嗰套，大駡何俊仁出賣香港人，又話以後投票畀晒公民黨，正是意見人人不同，究竟那一方佔多數，到了2012年立法會選舉，便會知道。平時聽到睇到嘅一個大印象係，識英文嘅香港女士鍾意劉慧卿多啲，只識中文嘅男士，可能傾向公民黨、社民連。
一位讀者來函問及家中藏有幾瓶白蘭地，有VSOP，有XO，已經收埋三十年，問是否收藏得愈耐，價格愈高？去邊度可以出售？對於洋酒，左丁山係外行，唔敢講，不過上星期啱啱認識咗一位洋酒董事F，向佢請教過收藏紅酒之道。洋酒F話過普通人將原裝酒瓶放在家中（例如廚房廚櫃）或客廳酒櫃，好容易損毀原酒嘅價值，因為每日氣溫，濕度嘅變化都對酒質有影響，即使放在紅酒專門櫃，內設恆溫，亦未必掂，事關香港天氣乾濕不一，早晚唔同，真正靚酒，如果要等升值而唔係自己飲嘅話，要放在「藏酒專門店」，先至有啲品質保存嘅保證。
葡萄酒或與白蘭地唔同，不過道理應該差唔多，一切要視乎藏酒方法而定。現時市場唔興飲白蘭地，XO與VSOP係三十年前時興啫，現在個個在喜慶場合飲紅酒，白蘭地點都唔會貴得去邊，讀者S請勿寄予太大希望。
收藏古老事物，以字畫、古董最為發達。古董、字畫收藏家L在馬會食飯，見到左丁山，問道：「買股票、地產多唔多升值一百倍之故事？」真係難講，即使有，亦只係極少數，四十年前用幾萬銀買美孚新邨一個單位，揸到家，應該升值一百倍以上。收藏家L話：「中國大陸盛產暴發戶，乜嘢字畫、古董都炒貴晒，不少文物價格與三十年前相比，動輒升二三百倍，但真正收藏家邊肯賣o架，多數藏到至死方休，除非後人破產啦。」個人收藏確係會衍生問題嘅，若遺囑不詳細寫明，隨時會引起爭產風波。幾年前在馬場聽一位收藏家肥B講：「我睇化咗咯，清朝、明朝文物點會落在我手上？梗係以前嘅收藏家要錢使先至變賣啦。正是花無百日紅，點知後人以後會唔會賣晒我啲心頭好？不如我自己賣番晒出去，省卻麻煩！」啱嘅，只在乎曾經擁有啫。