行政會議召集人CY梁振英成日喺房屋問題同政府唱反調，令到人大常委范徐麗泰都忍唔住暗批佢要有政治道德。民生方面同煲呔唔啱嘴形啫，政制發展上面應該一致喇啩，所以當劉慧卿話要請行會成員夏佳理去上網台節目做嘉賓時，夏佳理就即時話要搵CY拍住上，講吓點樣推動民主、改善民生喎。
請嘉賓竟然都有買一送一，卿姐當然求之不得；但CY之前請過卿姐食檸檬，為免今次食詐糊，卿姐日前就親自打電話畀CY，了解CY意向如何。點知卿姐call咗CY幾日都冇回音，正一冇尾飛陀。如果有意參選特首嘅CY仲未被范太打沉，睇怕先要戒咗董建華「議而不決」弊病，否則唔選好過選。