最近聽唔少Sales話，舊版Blu-ray碟，最平$88已經有交易，計落仲抵過新出DVD，真離譜！呢頭講完，點知今個禮拜返嘅《撕票風雲》，仲過份到$99藍光價，新碟之中肯定全場最平；入面有幾場槍戰以及打交位，重低音好勁，齋用嚟試機都筍啦！
記者：陳國輝
槍聲測低音左右飛
呢套電影同平日睇開嘅警匪槍戰片有啲分別，佢唔係一味燒炮仗式不斷轟轟聲，而係用長距離槍械為主！例如中環一幕華哥大戰神槍手，佢哋雖然無近距離交鋒，但由於二人相差近一百米距離，加上一個喺地下，一個喺十幾樓，每次開槍，子彈由左至右，或由下而上穿梭，都Feel到喇叭發出嘅微弱聲，位置感唔算好強，但勝在夠真實。
到臨結尾嗰幕，安志杰同人單挑隻揪，純空手搏擊，特別係突然爆水管嗰一剎那，音效非常震撼，不過都想提一提，拳腳聲嘅重低音似乎Over得好緊要，有啲失真，感覺似打機多啲囉！
層次豐富質感欠奉
比起音效，畫面表現似乎更勝一籌！特別要讚係人嘅膚色非常均勻，亦唔覺由於製作上嘅打燈問題，出現嚴重陰陽面。另外，黑位仍清楚睇得見層次，例如喺警署傾偈嗰幕，雖然環境好昏暗，但背景嘅大致輪廓、華哥嘅黑色頭髮甚至佢着住嗰件黑色皮褸，層次感都幾強烈；雖然畫面細緻，但皮褸嘅質感就唔係咁明顯，最弊係某啲場口竟出現顏色偏差問題，令整體感覺唔統一，算係美中不足吧！
雙雄決似《死亡筆記》
如果要提劇情，筆者特別想講吓兩位男主角嘅關係；全戲約100分鐘，查實華哥同三哥嘅正式對手戲，只得結尾幾分鐘！原因係大家都玩緊兵捉賊遊戲，鬥智鬥力，但過癮在佢哋一直以上網同電話溝通，其中一幕更仿似進入互聯網世界，對話間互相猜度、揣摩對方心思，三哥更突然變救世主，話唔相信法律，要替天行道咁話！睇完呢幕，你都可能以為自己睇緊《死亡筆記》！
Profile
片長：93分鐘
語言：粵、國語
音效：DTSHD5.1、DolbyDigital5.1
畫面：2.35:1
