有人會問：「森美小儀不是一對夫妻嗎？」說實在，這對當初由商台錄音室打滾，至踏上舞台闖出名堂，再跳進電視及電影圈的黃金拍檔，共同奮鬥人生最光輝的10年，兩人雖未有過愛情，感情卻媲美夫妻深厚。誰說男女之間不能只存在友誼，森美小儀肯定是最佳例子。
撰文：胡比
柴九話齋：「人生有幾多個10年？」商台DJ森美和小儀，這一男一女、一高一矮、一肥一瘦、一剛一柔，彷彿完全錯配的主持拍檔，攜手創造了屬於他們的黃金10年，兩人由互不相識、變成合作無間，到互相依賴、至密不可分，這份感情絕對是得來不易。
森美小儀雖說不上是金漆招牌，但總算打出名堂，他們共事的10年裏，當中有喜有悲，二人都慶幸能在茫茫人海中遇上，而且可以如此合拍。森美形容他們就似一對夫妻，他們是男主內女主外，森美說：「基本上工作上嘅內容都係我去創作，小儀就負責應酬囉，佢細細粒夠可愛嘛，我個樣又唔係咁討好，交際嘅嘢咪交畀佢囉！」
有一刻想過拆夥
夫妻難敵7年之癢，何況森美小儀是對「假夫妻」。森美直言合作幾年後問題開始出現，確實有「離婚」的衝動，他說：「我諗如果唔係一男一女拍檔，係男男或者女女，應該一早就散咗。記得合作到第5、6年嘅時候，真係有諗自己可以獨當一面，有啲抗拒再同小儀合作。」就在準備拆夥一刻，森美又打消念頭，因他忽然又顧及到小儀的感受，他說：「我又擔心小儀一個人唔掂。再過多年幾，又突然明白到如果冇佢，我又點會有今日？而且大家都接受咗森美小儀呢對一凹一凸嘅拍檔，人哋都咁受落，冇必要拆自己招牌啫！」
無論在鏡頭前抑或做電台節目，「大男人」森美不時會嘲笑或奚落「儍大姐」小儀，有時還毫無保留地喝罵她，大家以為森美是為了節目效果而與小儀預先夾定，森美自己招供：「我真係鬧佢o架！不過佢個人好樂天，點鬧佢都唔嬲，但呢個都係佢缺點，太樂天所以唔上進，我有時太擔心佢，所以先對佢語重心長。記得同佢做嘢第3年，佢都仲好依賴我，我成日叫佢畀心機做，唔可以成日靠我，佢都要有自己嘅路，但佢淨係識話隨遇而安，盡咗力咪得囉，個天自有安排，真係俾佢激死！」受小儀的樂天性格影響，令性格急進的森美對人生有另一領悟，他說：「以前我乜嘢都擔心一餐，擔心自己生活，擔心事業，要點樣升呢，好容易就忽略咗身邊嘅人同事。係小儀成日提醒我，叫我唔好咁多擔心，每件事都會有安排，sofar家每件事都算順利，仲識得分配時間陪屋企人。」
去滾都要小儀知
小儀既是森美的心靈雞湯，又是他的擋箭牌，森美笑說：「小儀係我一個好值得信任嘅人，我私事同屋企事乜嘢都會講畀佢聽，就算我去滾，都要同佢單聲，等佢幫我兜嘛！」
小儀經常被森美鬧，究竟她可有試過嬲呢？小儀想想後笑說：「好似冇喎！因為我明白佢係恨鐵不成鋼嘅心態，明白佢鬧我係為我好。」小儀洋洋得意的自誇：「好彩佢嘅拍檔係我咋！換咗第二個晨早飛佢啦，我肯定冇人肯同佢夾？」小儀表示近年森美越趨成熟，做人處世都改變不少，她說：「佢係一個機會主意者，乜嘢機會都想把握，連帶仲要推動埋身邊嘅人做到佢嘅目標。可能呢幾年佢見推極我都冇用，開始知道我資質有限，冇逼得我咁緊要，佢自己都冇拉得咁緊，識得點放鬆自己同放過身邊嘅人。」
小儀坦言以前有人問過她，同期出道的森美發展比她好，簽了經理人，工作量又比她多，問她可曾眼紅過？小儀卻說：「我從來冇唔抵得過，有時見佢有新工作或者攞到乜嘢獎，我只會戥佢開心，我仲覺得佢可以再上一步，因為我知自己嘅位置，每個人都有佢哋自己一套，唔需要羨慕人。」提到森美笑言去滾都會說給小儀聽，好讓她為自己擋駕，小儀說：「佢係乜嘢都同我講，我會盡量幫佢。但我都係女人，到最後我可能企佢老婆嗰邊囉！」
事業線vs現袋褲
森美小儀歌劇團同樣踏入第10個年頭，今年8月13日至18日會在理工公演6場。劇團10周年紀念，二人都覺得很有紀念價值，森美謂：「以前可能會有唔同嘅歌星客串演出，但今次想着重喺我哋兩個人身上，主題係監獄風雲，家咁興事業線，小儀到時會谷佢條事業線出嚟畀大家睇，我就會着現袋褲跳芭蕾舞。」問二人會否再咀嘴，森美說：「仲咀？咁咪又益咗小儀，咪搞，上次佢已經想伸埋脷！」小儀反駁：「係我順得人咋，叫我做乜我就做。」好一對歡喜寃家！
化妝：FionaWong@PerfectStage
髮型：LarryLi@SalonGoAhead
患難見真情
森美小儀並非一直順風順水，也曾陷入低潮期。06年他們在節目《架勢堂》中舉行「你最想非禮香港女藝人」網上選舉，備受婦女團體嚴斥，指他們踐踏女性尊嚴。事件引起軒然大波，《架勢堂》遭腰斬，森美小儀遭停薪留職兼被雪藏封咪兩個月。
塞翁失馬，森美小儀在谷底中互相扶持，令兩人感情更加深厚，關係昇華至親人般親密。小儀說：「停咪期間，我哋成日有通電話，互相扶持，大家都係用積極態度去面對，都幾難忘。」森美說：「呢件都算係我哋工作嘅最大件事，好感激當時公司同身邊人支持我哋。」
台上大放笑彈
眨吓眼，森美小儀歌劇團十周年了，陪着不少fans一起成長，森美小儀也一路長大。這十年變化，寫下他們的淚與汗及歡笑，也算是他們演藝生命中的成就。
