呢輪好興踩單車，小妹唔少朋友成家人每逢假期一齊出街踩車。小妹都好想買番部keepfit，靚女同事筍魚報料，話苗圃行動暑假舉行絲路單車助學行七天團，沿住青海踩單車，做運動又可做善事，幫助山區小朋友，一舉兩得。
小妹即刻打畀活動籌委會主席董美嬅Elsa攞料，佢話舊年9月首次舉辦絲路單車助學行，反應幾好，今年設計全新青海路線。單車途程大約200公里，從西寧巿入青海湖騎單車環湖，經日月山到鳥島，「4月我同籌委去青海探路，啲路幾好踩。青海湖嘅面積比香港大三倍，一望無際，喺夏天，鳥島有成千上萬嘅雀鳥棲息，好壯觀。」
啲路幾好踩
為今次助學行免費提供全隊單車及頭盔嘅鎮洋兄弟單車公司出錢出力，董事李達成Jason親自出征踩單車籌款。Jason教路，建議參加者家就要開始操fit自己，最好每星期踩車兩次，每次最少踩一個鐘，之後逐漸增加。
絲路青海團8月14日至20日，團費8,300元，加捐款5,000元或以上；絲路河西走廊團9月11日至18日，團費8,800元，加捐款5,000元或以上。另設二人一隊企業組名額，團費不變，要捐款3萬元或以上。兩團名額各80人，詳情瀏覽網址 http://www.sacycling.org.hk
電郵：mailto:[email protected]