世界盃作為全球最大足球舞台，球員都想盡辦法出位，球技不如別人，球隊實力也一般，最簡單方法是搞搞新髮型。網站Yahoo選出今屆世界盃10大出位髮型，可能是未來足球壇髮型新趨勢。牽牛、戰鬥員A
第1位：箭豬頭─咸錫
（斯洛伐克中場）
出位指數：★★★★
作為一個防守中場，如果外形夠殺氣，隨時嚇到對手腳仔軟，攔截都更容易；斯洛伐克中場咸錫就憑箭豬頭髮型，為斯國歷史性打入16強。雖然咸錫踢法「爛打」，但4場比賽只累積5次犯規，都沒有被罰牌，箭豬造型唔通連球證都嚇怕？無論如何，以今屆世界盃表現，加上煞食髮型，快滿23歲的咸錫成為新星之一，來季未必仍留在意甲拿玻里。
第2位：金色辮子─尼高拔桑治
（喀麥隆後衞）
出位指數：★★★★★
誰說老將不能搞「花臣」？34歲尼高拔桑治（圖），今屆就以正宗金獅造型示人；一把金色辮子頭，還留上金色羊咩鬚，加上健碩身軀，像極殺人王。惟教練拿古恩唔識貨，只安排這位特拉布宗老將任後備，對荷蘭後備上陣17分鐘，就緣盡今屆賽事。
第3位：洋葱圈─比哈美
（瑞士中場）
出位指數：★★★★
洋葱圈是外國出名的小吃，瑞士中場比哈美（圖）或者想球迷邊欣賞比賽邊可「飽肚」，所以以這個洋葱圈髮型出戰世盃；可惜比哈美受傷患困擾，第2場對智利的分組賽才復出，但又領紅被逐，令這些洋葱圈加添了咖哩味。
第4位：雞冠頭─賓特拿
（丹麥前鋒）
出位指數：★★★
踢前鋒，最重要有速度，丹麥前鋒賓特拿（圖）今屆就以「極速雞冠頭」出戰世界盃。賓特拿髮型雖然與咸錫有點相似，但賓特拿兩邊均「鏟青」，更添流線型；雖然未能助球隊取得佳績，但對喀麥隆快腳射入，可能也得到髮型之助。
第5位：蛋撻頭─C朗
（葡萄牙中場）
出位指數：★★★★
基斯坦奴朗拿度（C朗、圖）雖然被批評領軍無方，擔不起隊長之職，但相信樂於在隊中分享扮靚心得；C朗出名gel到硬一硬的蛋撻頭，今屆賽事，葡軍的法比奧干查奧、魯爾梅利斯及比比都以此頭出戰，唔通C朗係定型啫喱代言人，向隊友派gel？
第6位：軟雪糕─耶巴達
（阿爾及利亞中場）
出位指數：★★★
朗拿度在02世界盃以河童頭出戰，阿爾及利亞的耶巴達（圖）以相似髮型應戰；四周鏟光，只餘頭頂一小束頭髮。不過，耶巴達一來白髮、二來頭髮又較朗拿度長，為食球迷可能以為它像一團軟雪糕，或像一堆粉絲。
第7位：中間分界─謝雲奴
（科特迪瓦前鋒）
出位指數：★★★
非洲球員都喜歡蓄辮子頭，但科特迪瓦前鋒謝雲奴（圖）實在太異相；沒有為辮子頭加色，已經悶，還要加一個中間分界，簡直嚇死人。或者教練艾歷臣都對謝雲奴的髮型受不了，3場比賽這位科特迪瓦10號都打唔足，3場比賽謝雲奴亦交白卷。
第8位：白色直線─施斯
（法國前鋒）
出位指數：★★
施斯（圖）據報因為妻子是髮型師，所以頭髮常染到七彩；但今次出戰南非，施斯只保留頭頂一行直線，並染上白色，與白鬍子相配。施斯髮型雖然「普通」，但已比他場上表現出色，施斯只對南非一戰上陣，球隊也恥辱地分組賽不勝出局。
第9位：亂草頭─佩奧爾
（西班牙後衞）
出位指數：★
一生只愛一個，可以叫長情；但一生只保持一個髮型，可以叫悶；西班牙後衞佩奧爾（圖）由初出道，已經留了這束「亂草頭」，一把又長又曲的髮型；不過佩奧爾面相又不配合，一雙圓眼加上大鼻子，可為電腦公司Geico拍廣告。
第10位：披頭四─美斯
（阿根廷前鋒）
出位指數：★
阿根廷前鋒美斯（圖）一向以球技，而非外表征服球迷；平時衣着簡單，髮型更是不修邊幅。今次出戰南非，美斯繼續以一把及肩長髮示人，猶如張家輝扮潦倒化骨龍，或者「oldschool」的披頭四；當然對美斯來說，打入4強比外表更重要。
（5★為最高）
