馬季即將結束，今日美國慶祝國慶，香港就馬照跑，係第八十一次賽馬，到咗法國國慶日，七月十四號夜晚，在跑馬地跑夜馬，慶祝煞科。
今日沙田跑馬，有特別節目，就係第七場香港傷健策騎協會盃，由第二班馬跑泥地一六五○米，有線電視大班史提芬今年榮任傷健策騎協會（RidingfortheDisabledAssociation，簡稱RDA）理事，又適逢有線直播二○一○年世界盃即將圓滿結束，直播期間，聽講收視率極高，訂戶人數持續上升，廣告又爆棚，唔怪得史提芬心情靚到極，趁今日有RDA賽事，特別在JCBox（賽馬會廂房）請客，招待傳媒高層，一來慶功，二來講解吓RDA呢個慈善志願團體嘅工作喎！
對於RDA，左丁山略知其二。二○○八年奧運馬術賽舉行前曾到屯門騎術學校參觀，見過不少殘障人士以無比意志，奮力騎上馬背，說也奇怪，一啲面帶憂鬱嘅兒童，從坐輪椅變為騎馬之後，就會露出天真笑容，教人安慰，可知道騎馬可為傷健人士提供心靈雞湯。RDA於一九七五年由麥理浩夫人創辦，至今三十五年，現於薄扶林有一個獨立場地，為肢體殘障人士與智障人士提供治療性策騎服務，每年提供多過六千課策騎課程，學生逾三百五十人。
今日RDA盃由馬會主席兼RDA會長陳祖澤頒獎，主席楊國琦、榮譽司庫何志強及RDA盃籌委會主席吳嵩亦會出席頒發小型獎盃畀馬主、練馬師及騎師。呢場馬究竟邊隻有機會呢？粗看之下，左丁山認為新亞校友賴偉智之1號「卓爾非凡」，係主要爭勝馬，此外還有大馬主羅建生嘅4號「喜威寶」、泥地王6號「萬能駒」三匹，鄭家純隻11號「奪寶」，以至蔡神仙馬房嘅8號「披星戴月」可以威脅，冷氣機行尊米嘉樂擁有嘅10號「至勇飛龍」，亦可突如其來。總之呢場馬形勢平均，要臨場到沙圈吼實馬匹動態先可以知道邊隻機會最高。
輸馬當係做善事，捐錢畀RDA又係做善事，史提芬平日收埋唔少，今日中午一於叫佢捐多啲，造福傷健策騎人士先。