花無百日紅，7.1遊行俾人由頭鬧到尾嘅白鴿黨，辣㷫好多支持者，忠心擁躉聲言要用選票懲罰民主黨，原來唔使等到明年區議會選舉或後年立法會選舉，市民前日已經真金白銀用鈔票懲罰咗民主黨，遊行當日民主黨只籌到4.5萬元左右，遠低於去年30萬元，在三大黨中籌款數字包尾。
有人捐20元先撕爛紙幣
7.1遊行係泛民黨派、團體年度籌款大日子，去年食住六四20周年個勢，民主黨狀態大勇，一枝獨秀籌到破紀錄逾30萬元，總共賣出2,500件「曾蔭權不代表我」T恤；今年因為支持政改成為眾矢之的，有市民甚至將20元紙幣撕爛才放入錢箱，以示不滿同憤怒。市民不滿被民主黨出賣，元老華叔反駁選民唔係豬狗，出賣唔知值幾多錢，籌款急跌25萬元呢個數字，唔知華叔點睇？
籌款成績差，民主黨內亦承認同市民不滿佢哋有關，加上只有三個街站，09年有11個，今年又冇政治明星嗌咪，所以「吸水」能力大減，另一原因係民主黨街站全程被人圍攻，警察用人牆保護，市民想捐錢都未必逼到去錢箱，因為咁而冇咗幾多錢，無從估計。至於去年異軍突起嘅社民連，有黃毓民、長毛坐鎮，一個下晝就籌到25萬元；今年成績亦十分標青，係三黨之冠。黨主席陶君行稱有超過26萬元進賬，毓民話若非要守尾門保護民主黨，令佢遲咗到街站嗌咪，籌款金額應該更高。
亞軍公民黨今年籌到約20萬元，同去年差唔多，該黨成員笑稱，大狀冇乜生意頭腦，余曾辯後余若薇人氣驟升，早知急推新產品應市，應該可以籌多啲錢，家陣捉到鹿唔識脫角，錯失良機。雖然民主黨籌款數字少一大截，但公、社兩黨收穫都冇大幅增加，反映支持者只係㩒實荷包，唔想捐錢畀民主黨，卻冇大量流失到公、社兩黨，有民主黨人認為，如果樂觀啲、正面啲睇嘅話，顯示擁躉並未變心，假以時日，相信有辦法挽回支持。
mailto:[email protected]