之前挑戰過好多高難度舞蹈嘅G奶蔡依林（Jolin），嚟緊又會為新碟喺舞技上再上一層樓，唱片公司更為佢花咗50幾萬跟美國著名舞蹈師BennyNinga以及韓國東方神起嘅御用排舞師AhnHyungSuk學舞。
「我一定要做到」
其中Jolin學跳一種叫做「Voguing」舞，要佢用雙掌互握再旋轉身體，哇！齋聽都知難度高，唔怪得Jolin話喺韓國苦練時差啲連手骱都甩埋！
呢位Benny今次特別教Jolin呢種「Voguing」舞，幾乎大部份動作都係用手部姿勢做重點，當Jolin第一次睇到雙手扭到黐埋嘅片段時都忍唔住大叫：「也太難了吧！」
Jolin喺星期二再到韓國繼續苦練，原本佢要雙手互握，不過佢家似乎仲未做到，但下星期Jolin就要跳呢隻舞拍MV，佢不停鼓勵自己：「我一定要做到！」工作人員見Jolin咁都不斷提醒佢唔好逞強，擔心佢受傷，仲擔心會影響新碟宣傳。
周杰倫自誇超人
至於近嚟盛傳同Jolin復合嘅周杰倫（Jay），呢幾日都忙喺內地宣傳，搞到瞓覺都幾乎冇時間。前日Jay接受內地媒體訪問提到新歌《超人不會飛》時擺明為自己平反，佢話：「我做了很多很經典、特別的事情，其實我還是一個超人。」至於提到「雙J復合」，Jay好大方話同Jolin關係好好，仲好期待兩人喺音樂上嘅合作㖭。
