7.1過後中環無大事，瀰漫假期情緒，議員開始想放暑假，立法會內務委員會主席劉健儀噚日建議月中開特別會議，為《競爭條例草案》做準備工夫，以便9月就可以開始審議，唔使拖到10月立法會暑假後復會先開始討論。
需知道好多議員放暑假9月都未返香港，劉健儀無視呢個政治現實，引起各黨派議員異議。民建聯葉國謙即時投訴，指咁搞令議員冇假放，以「假期人唔齊，做唔到」為由反對。公民黨湯家驊強調自己唔係偷懶，只不過「好多人七八月都要唞一唞」；代表商界嘅梁君彥更話，「我覺得喺暑假做任何嘢都唔係一件好事。」最後連劉健儀黨友「廿蚊張」亦開聲，稱「睇唔到呢條條例有逼切性」，質疑是否需要咁匆忙審議，群情洶湧下，最終劉健儀只有投降，當佢冇講過。