今屆世界盃8強喺噚日開始捉對廝殺，而場外亦有一個8強戰場，就係代表8個國家嘅世界盃小姐嚟一個跟足8強交叉表對壘啲互射點球大賽，結果阿根廷小姐絲莉高芙過關斬將連贏3場稱后，贏得呢個PK版世界盃，話唔定為今日惡鬥德國嘅阿根廷爭勝造勢喎！
似足港版o靚模愛拋胸
世界盃，淨係得足球當然太齋，加啲養眼嘅靚女宣傳下效果自然唔同，有關方面今屆搵嚟代表32個參賽國家嘅美女參加世界盃小姐競選，呢班靚女近月出席無數活動，似足我哋香港啲o靚模咁好識拋胸騷身材搶鏡。
代表阿根廷嘅17歲女學生珍妮花，上個月當選比賽冠軍，當時阿根廷媒體用好大篇幅報道呢單消息，話會為國家隊帶來好運喎。無巧不成話，小妮子原來係阿根廷同埋德國混血兒，今日8強阿、德大戰，唔知佢捧邊隊呢？
唔知，只知事隔一個月後，另一個來自阿根廷嘅絲莉高芙為國家梅開二度，今次係贏PK戰。話說8位美女前日捉對廝殺，多人注目嘅西班牙小姐羅拉身材高䠷又省鏡，加埋平時剔波宣傳時有板有眼，被睇高一線，結果佢不負所託先擊敗嚟自巴拉圭嘅靚女，到4強遇上絲莉高芙。後者先挫德國小姐，可以話為去屆決賽周射輸俾德國嘅阿根廷復仇。
決賽射贏加納小姐
不過，唔知西班牙小姐羅拉係咪睇得今屆決賽周比賽太多，好學唔學似足啲廢柴守門員，明明擋到個波都拍個波入網；到佢射波時又跣腳射斜，結果將個決賽權拱手讓畀絲莉高芙。決賽係絲莉高芙對加納小姐艾利美（一個斷估好難喺現實世界盃出現嘅戲碼啩），最後絲莉高芙一腳射向右下角奠勝，成為呢個賽事嘅贏家，捧獎座時不知幾風騷。假如阿根廷贏得今屆世界盃，話唔定馬勒當拿風騷過佢。