Cosplay版孖寶賽車　變面老翻王

《孖寶賽車》過檔PS3？睇錯！呢隻由UnitedFrontGames開發嘅《ModNationRacers》，同樣玩盡陰招損人利己，仲加入大量改裝模式，改車好正常！但惡搞埋人物造型，鍊鍊吓車，突然發現隔籬個Friend原來係阿凡達、孖寶兄弟，甚至係麥當當叔叔，都咪話唔笑到碌地！

記者：陳國輝

換臉換車換賽道

《MR》並非為模擬真實賽車而設計，主要目的係想俾大家笑餐飽！最頂癮係佢個改裝系統！玩《GT》你可以逐項數據慢慢微調，甚至玩嗰陣電腦會計埋風速等物理因素；但《MR》明顯無咁Pro，完全玩造型，將老爺車變身鬼馬呠呠車！
至爆係連車手個樣都可以任改，個個角色似曾相識，例如電影代表就有蜘蛛俠、Ironman、哈利波特；而遊戲方面就有Mario、薩爾達、蛇叔甚至有《街霸》嘅蘇聯佬㖭！此外賽道亦可以自行設計，簡單如加入沙石等路障，再專業啲你仲可以更改埋賽道走向，論自由度，呢隻Game肯定爆晒燈！

■喺賽道上加啲建築物做障礙，話咁容易。

■個個人物似曾相識嘅角色，爆！

■改車嘅外觀會對性能有影響。

陰招前後夾擊

玩《孖寶賽車》最過癮係乜？之唔係惡搞人囉！《MR》可說是更係變本加厲，例如用雷電劈你架車，又玩噴火燒到你變乳豬，最得人驚睇怕係瞄準你車尾發射導彈，追到你跳橋自盡為止，簡直係陰招之王！由於使用PS3平台，使出陰招時畫面非常華麗，過程更有動畫俾你欣賞，好似被對手炸到飛起嗰陣，架車彈到十幾層樓高，再成隻雞咁撻番落地，全程好似實況直播，超爆笑、勁投入！

■網友新作品在Share可睇到。

■成串導彈追尾，問你死未！

12人連線齊齊玩

RacingGame一定要多人先熱鬧！唔駁Network玩，肯定變成孤獨精！《MR》除咗最激能同時容納12人齊齊網戰外，仲可以挑戰影子車神（即係網絡上最勁成績嗰一位），甚至將你自行設計好嘅賽道，同班網友一齊分享。但要留意，由於各人所用嘅網絡速度有別，筆者試玩發現，明顯每撈一次新模式，大約要等十幾廿秒，至於比賽中途則表現穩定，大家唔使點擔心。