甄子丹喺電影裏面一句「詠春，葉問」，加上喺戲中狂打欺負中國人嘅日本仔同鬼佬，大快人心之餘，亦令唔少人心郁郁想學番一招半式，有後生仔真係的起心肝去拜師。
除咗詠春，原來洪拳都有唔少人學，香港最出名洪拳師傅之一、林世榮徒孫江沛偉話，電影《葉問》的確令武林中興，多咗人拜師，但江師傅呼籲年輕人要虛心學習，持之以恒習武先會有好嘅收穫。江師傅係黃飛鴻第三代傳人，早年在香港創立洪鳳派，將洪拳同鳳凰派融合，過去幾十年弟子數以千計，當中多數係想習武強身嘅後生仔，亦有金毛、紅毛兼紋身大漢嚟學拳。
江師傅話明白佢哋來意，但本住有教無類精神，希望可感化佢哋，所以一視同仁指導，「用心不良嚟學拳嘅人，好快就捱唔住，自己會走。」江師傅又話，學拳要從最基本學起，淨係學紮馬都要一年半載，以為可以速成出去打打殺殺，好快過主。
《葉問》帶起詠春潮流，江師傅承認好想有人拍攝關於洪拳嘅電影，港台率先搵佢同其他洪拳傳人介紹正宗洪拳，今晚7點35分無綫翡翠台《功夫傳奇》有得睇。