孫耀威噚日喺荃灣為「荃灣藝術節宣傳日─藝墟」擔任表演嘉賓，問佢有冇留意香港先生嘅面試者當中，綽號「陽光老孫」嘅參賽者？佢話：「都幾靚仔，咁似我都唔差得太遠。」孫耀威話呢排要操番六嚿腹肌：「近排睇世界盃成日飲啤酒同食公仔麪，肥咗成10幾磅，胸都大咗。」問到胸大有冇令女友Macy自卑，佢就讚女友身材均勻。