今年7.1遊行反常，焦點不在龍頭而喺龍尾，嗰度唔止記者多，警察都特別多。民主黨隊伍嗌一句「爭取普選」，旁邊一路跟住唔放嘅示威者就嗌一句「出賣港人」，民主黨再嗌一句「無畏無懼」，示威者又嗌一句「出賣港人」。
火藥味濃，警方自然好緊張，有位哥哥仔着住便服幫民主黨開路，去到銅鑼灣路面收窄嘅地方特別緊張，猛叫記者唔好阻住。八方見佢唔似一般義工，問佢係咪阿Sir，佢答話係，唔知真定假。有位市民現場又向八方報料，指民主黨隊伍中有個着住民主黨Tee、戴有糾察臂章嘅男士疑似警察，八方問過PPRB，警方話「絕無此事」。
街站前一字排開
除咗便衣，大批藍帽子喺銅鑼灣一帶築成人牆，隔開行人路邊嘅示威者同民主黨隊伍，不過喺度擺街站嘅民間電台阿牛就好無奈，因為藍帽子喺佢檔口前一字排開，阻住市民捐錢。阿牛頻頻叫咪，要求警員讓番啲空間出嚟，最好笑係民主黨行過咗，輪到社民連啲支持者經過，警察仍然死守，阿牛惟有嗌咪話「呢啲唔係o架！」