話咁快暑假殺到嚟，家姊叫小妹幫手睇吓有乜親子團啱佢個寶貝仔玩。呢個小魔怪係超級動漫迷，一於帶佢去旺角銀行中心五樓東瀛遊行吓，嗰度啱啱變身成為全港首間高達主題旅行社，仲推出連串嘅高達團。
小妹上去睇過，門口擺咗一個高2.3米高嘅元祖高達頭，好鬼搶眼，仲有好多別注版嘅高達模型，吸引咗唔少細路影相。東瀛遊執行董事禤國全Steve話，暑假係親子遊旺季，小朋友鍾意睇動漫，今年適逢機動戰士高達模型Gunpla面世30周年，咪同Bandai合作將旅行社打造成一個高達館，「等啲客嚟呢度報名時，見到咁多高達模型都開心啲。」
只辦一團收費$6899
Steve話，Bandai為咗慶祝30周年，由7月24日開始成個暑假喺靜岡總部嘅JR火車站，擺放一個18米高嘅1比1高達，「我哋設計全新暑假五天東京團會去睇呢個1比1高達，同埋去富士急樂園睇瞓喺度1比1高達」。
但講到戲肉梗係9月19日出發、全港只此一團嘅靜岡高達總部五天團，Steve話，Bandai高達模型總部平日唔會對外放開，經特別申請入去都要等一年，今次同Bandai合作，團友先有機會入去，但都係批一團約30人，「團友入到總部可以同高達、紅彗星、渣古等珍藏版模型影相，着住聯邦軍服嘅職員會帶團友參觀生產過程，最後當然唔少得購買限量版模型啦。團費$6,899」。
Steve話都幾睇好今年暑假嘅巿道，啲客早到5月中開始報名，所以預計生意額按年有三成增長。
電郵：mailto:[email protected]