近日少有地有藍天，加上日頭都幾毒，又係碧波暢泳好時光；不過近日市面出現喬裝手錶、火機偷拍CAM，唔知唔覺下連Movie都影埋！姊妹們固然要小心！買嚟玩時更要當心，同自己女朋友偷偷拍生活片段好喇！
記者︰陸俊雄
攝影︰林栢鈞
Model︰Lowell、Alia@PureModels
防水錶 12點拍片
有拍攝功能的手錶，其實國貨都出過唔少，不過可以落埋水，拍到1,280×960影片，即是去到720p高清的，加上內置2GB，呢隻EZ10RD74防水攝錄錶都算厲害！
係咪真係落到水？盒面聲稱水深達30m，但同時說明書又話自己唔敢包水中一定操作正常，但生活防水就無問題。我都唔理咁多，照將佢放落泳池玩，實試水中拍攝總算無問題。佢個鏡頭收得好詭秘，不在錶邊任何一個按鈕之上，極蠱惑地放在錶面12點的位置，由於是針孔鏡頭，所以極微細，唔留心隨時睇佢唔到。
想拍片時，只要按右上角按鈕，等6點位置的一顆小紅燈閃爍就即刻開拍；至於拍攝效果，講明最佳拍攝距離是50cm或以上，相對後面介紹的兩個拍片火機，它的影像質量是最高的一個。不過在過片入電腦時，講真都幾慢，AVI檔、200幾MB，過兩至三分鐘都未得。
扮ZIPPO打火攝錄
另一件嚇倒我的，是這個黑色火機—DV006打火機高清攝錄機，佢最厲害的地方，係可以扮點火扮得似模似樣，真可以磨動火石，造出火星效果。而中間整個銀色膽，是可抽出來的，過片要用跟機附送的USB線，只要插上底部即可。套回黑色金屬外殼，其實只會見到底部有一小孔，是鏡頭所在位置，以及一小處凸出來的地方，那個就是開始掣，一按即拍。影片解像度都是1,280×960、AVI格式，但出來感覺顏色有點偏紅，而且真要習慣一段時間，掌握鏡頭位置，才可對中拍攝目標。
即棄火機可插卡拍
最後一件微型CAM設計殊途同歸—DV005打火機微型攝錄機，佢個樣更普通，跟一般用完即棄火機幾乎無分別，令人防不勝防。
呢個黃色火機詭秘處在頭同尾，將個頭拆出來，根本同一支USB手指無異，一反轉，可以見到插microSD卡位；怕你唔夠錄，直接插卡連內置容量都沒有。鏡頭則同樣設在火機底，一個微細小孔，就係咁神不知鬼不覺，拍到1,280×960的AVI格式影片；拍攝時只須一按火機頭就係，不過玩呢類小工具真係要企定定先拍到，因為太難掌握鏡頭位置了，很多時都拍唔中目標，而且身體稍稍輕微移動，畫面都會變成劇烈搖晃，睇片時玩死自己。
售賣點
JCShop(31022783)
銅鑼灣時代廣場9樓903A號