繼世界盃之後，有線Cable又有新招──噚日（7.1）朝早6點，新華社電視台正式喺佢哋嘅66台啟播，仲要係獨家嗰隻！呢個台有幾架勢？兩個字──權威！
話說呢個台係中央落柯打叫新華社搞出嚟，終極任務係打造具有國際影響力嘅新媒體，要中國嘅聲音唔再俾西方忽視，要中國喺國際舞台上有say，仲要有權威、有公信力，即係做中國CNN咁啦，絕對唔講得笑！
咁呢個台有咩睇呢？Cable話，係會以普通話全天候24小時不停播放新聞資訊，用中國視角全方位報道地球每個角落嘅大事，增加觀眾嘅資訊同埋觀察視角。
華華就咁諗，世界盃都只係四年一劑，仲要係過癮一個月就算，但今時今日香港個個面向神州，阿爺嘅諗法，個個都想第一時間知，咁呢個台就正喇，至少自己科水畀Cable，就可以自己接收中南海嘅「視角」，好過靠班號稱親中愛國嘅人士，或者高官口傳，仲要傳錯呢！