世界盃打到一半，球迷正好回回氣上街，噚日有球迷拉橫額控訴有線電視，批評壟斷世界盃播映權無恥，要求有線「還我世界盃」 。發起人Isaac係80後，同五個同事共六人一齊上街。佢話香港雖然奉行市場經濟，但四年一度體育盛事，應該畀最多市民觀看，今年由有線壟斷好唔妥，「市民連基本睇波享受都冇，乜都由大商家話事，有的過份！」
唔想俾有線魚肉，Issac話寧願去酒吧、商場睇波都唔裝有線，又要求政府下屆世界盃應該做啲嘢，佢話唔奢望好似內地同胞咁有免費波，但政府學吓新加坡都收貨，「當地可以簽兩個月約，唔使綁兩年，比較合理啲。」四年太長，來屆奧運又係有線囊中物，Issac希望政府快啲做嘢。