【本報訊】民主黨選擇溝通談判的策略未能取悅各方，連日來受盡侮辱與指罵，不少支持以溫和手法及談判策略爭取民主的市民昨天挺身而出，主動走入民主黨大隊給予支持，強調支持民主的人應該有包容精神，反對部份人向採取不同策略的人士作出攻擊及謾罵。
「民主係互相包容」
本身是醫生的劉先生每年都參加7.1遊行，今年卻是首次相約友人跟隨民主黨出發。他支持政改改良方案，認為有實質小進步，認為支持民主的人應該互相包容而非互相攻擊，「如果大家唔互相信任，做乜嘢都唔會成功」。
他更力挺司徒華及何俊仁爭取民主長達20年，「今日要懷疑佢嘅誠信係講唔通」，稱「正正因為呢個原因，我今日要約埋朋友嚟支持民主黨」。
市民李先生對改良方案並非百分百支持，形容是「無可奈可的選擇」，但相信時間會證明一切，「喺咁嘅形勢邊個有水晶球？咪睇以後發展係點囉」。他認為泛民各政黨都有自己的利益與計算，「做市民嘅只要將矛頭指向建制、指向中央，我哋使乜估佢哋咁多嘢」。他今年首度走入民主黨大隊，原因是民主黨在泛民中處於弱勢，「我哋大家一定係槍口對外，無論策略係點都好，矛頭都唔應該係標榜同一目標嘅政團」。
從事物流行業的徐先生指「民主係互相包容，唔可以太激」，支持與中央溝通爭取民主，「如果樣樣都唔妥協、唔接受，就會乜嘢都冇」。縱使泛民支持者的觀點與角度或許不同，他不希望支持者互相攻擊，日後會續撐民主黨，「我唔信何俊仁會出賣港人」。
支持民主黨多年的劉小姐認為改良方案是「冇辦法之中嘅辦法」，希望各方理性討論，「其實太過激進對雙方都唔好」。