中貿林在中午飯局，問左丁山知唔知道甚麼是24,776名，幾乎俾佢考起，飲啖茶，諗真吓，好似有啲印象噃，似乎曾在《蘋果日報》見過。中貿林再講：「中文大學收內地學生收到第24,776名呀，人哋話中文大學係不入流學校呀！」
哦，咁就醒起嘞。人講佢又信，唔似做慣中國貿易啫，做中貿之人，知道最多內地新聞，點會明知亂講嘅傳聞都會半信半疑o架。六月廿七日〈名采〉副刊有高慧然「隨遇而安」專欄講「曲線入中大」，引述內地讀者之言，指佢嘅仔考試在全省排名24,776名，只能報讀「不入流大學」，剛好達到香港中文大學在大陸招生的分數要求，故此決定報讀中大，所以高慧然話希望子女入中大嘅家長，不妨走曲線移居大陸讀中學，以大陸學生身份報讀。
大陸讀者當然對報讀中大完全不了解。中大在內地招生係參加全國統招嘅，成績差少少都唔使填報。去年中大招收內地新生約三百名，百分之九十三嘅高考成績，在佢哋所屬省份，皆排名在前五百名。考到第24,776名喎，如果家有一百萬元嘅（如高慧然提及），不妨考慮去外國之私立野雞大學報讀，唔知邊啲係，可以問吓DavidWebb。
內地生來香港讀書四年，未必要使一百萬，五六十萬就差唔多。香港家長想話曲線入香港嘅大學，千祈唔好叫子女到大陸讀中學（除非佢哋好叻）。《南華早報》早有報導，一啲有錢家長送子女到英國讀私立寄宿學校，考GCSE高級程度，再以考試成績申請入香港大學或其他大學。英國高考程度較低，攞Ａ比較容易，考到四Ａ五Ａ者，大有人在，《南華早報》就訪問咗一位在英國高考得四科Ａ透過Non-JUPAS而入咗港大經濟金融學院嘅學生。但不可不知，香港高級程度高過英國，好多時，一個英國Ａ被視作一個香港Ｂ，左丁山幾年前代朋友詢問，就俾一位著名教授點醒咗呢樣嘢：英國高考水平下滑，分數上升，香港不會全盤照收！