呢幾個月都係結婚旺季，其中搵架見得吓人嘅花車，可算係頭痛位之一，有幾千蚊「筆直」租花車嘅，推介今日呢架古典粉紅RollsRoyce，乜都包套餐都係三千零蚊，就算事前攞嚟求婚，成功率都起碼高一半！
記者：徐影龍
攝影：陳陶鈞
Model：Kitterick、Vanessa@PureModels
鳴謝：皇后花店（25227711）
人生大事，梗係想有咁靚得咁靚，好多新人點慳都好，搵結婚花車一般都唔會太求其，話晒有相有片留念，寧願花多啲預算落租車度，點都好過放喺食落肚轉頭就唔記得嘅魚翅。豪華房車租價一般四千至六千元，不過專搞婚禮籌劃嘅銀禧，都係收三千零蚊，租車平過人之餘，仲有大量罕有古典車款，好似呢架勞斯萊斯SilverSpurIII咁，粉紅色車身，高貴浪漫到痹，唔只影相拍片夠好睇，連出發中途，都包你收視率爆燈。筆者坐完一轉測試「粉紅勞斯」搶眼度，每逢停親巴士站、燈位行人路，九成以上目光一定望住架車，仲威過隔籬架戰神GT-R。
SilverSpurIII屬94年款，唔算太舊，全車翻新得幾好，最緊要內櫳極級闊落，坐上去你會明白到咩叫有錢人嘅享受，若然塞滿埋幾乎逢女都啱嘅「哈囉咪咪」，齋睇呢份粉紅心思，媾女或求婚成功率都必然大增。
成本價省招牌
咁豪咁靚嘅車，原來租價唔算貴，$3,588三小時套餐幾乎乜都包，如港九新界任你去，司機、油錢統統都免，你只需齋畀隧道費，高興嘅，大可三粒鐘內同愛人遊勻東涌、沙田、尖嘴，再兜去淺水灣行大運，呢份粉紅驚喜，唔係邦邦級數嘅有錢人專利嚟嘅。銀禧負責人Tiffany坦言，未計架粉紅Rolls一年超過20萬嘅保養等雜費，單單副偈都成6,750cc，油錢連埋司機，基本上無乜賺頭，呢個價只為省靚公司婚禮籌劃個牌頭。「我哋都幾揼本o架，除勞斯萊斯，仲有全港唯一一部嘅賓利TurboR，連車牌都特別投番嚟，如888、ME32（我的心意）等，令客戶嘅人生大事錦上添花！」
蘋果筍價$2,999
首5名登記之《蘋果》讀者，可以$2,999優惠價，獲享粉紅勞斯萊斯或貴族賓利「3小時行程服務」套餐（原價$3,588），已包車租、司機及油費。登記及查詢詳情，請致電銀禧旅遊。
登記及查詢熱線：35555656
全港唯一賓利
除咗鎮店之寶粉紅Rolls，3小時套餐仲有架85年經典款BentleyTurboR畀你揀，全港只此一架，朱紅色車身，有派頭兼有意頭，仲要翻新得好靚。
