【上海直擊】Angelababy（楊穎）與黃曉明戀情浮面，有消息指她7年間不斷整容，近日更為了綁着愛郎再度加工，昨日Baby在上海出席活動時表示有意效法范冰冰找醫生驗證沒整過容，但就不會驗胸。
工作排得密密麻麻的Angelababy，昨日現身上海半島酒店出席日本少女內衣品牌PeachJohn內衣騷，大會安排了6位模特兒行騷，徐淑敏（Suki）與老公Kenny也專程飛到上海捧品牌老闆娘、濱崎步契媽野口美佳場。
「香港醫生唔肯做」
有報道指Baby7年間不斷整容，完騷後她回應此事時表現激動，更謂曾因此喊，以及炮轟雜誌一次又一次說她整容，Baby說：「本雜誌應該積口德，我想做一次驗證，決定年底搵醫生check，不過香港醫生唔肯做，我會效法范冰冰搵內地醫院驗證。」
問Baby是否介意男友相信她整容，所以有此一着？她說：「唔係，係為咗自己，因為承受呢個壓力好辛苦，唔想再被雜誌同網上嘅人攻擊，如果係真我會認，但我冇。」早前也傳Baby隆胸，她可會也驗證身材？她說：「身材唔打算驗，因為好private。」
訪問期間Baby再三強調沒整過容，她說：「之前影箍牙相影得唔好，睇番都會諗呢個人有冇，嗰時啲相影得唔好，箍牙時塊面會腫、嘴會腫。」至於近日有o靚模影妄攝寫真，她表示不太清楚，認為每個人都有自己成功的方法，但不會鼓勵師妹做。
Suki獲萬元內衣
此外，Suki謂PeachJohn的老闆娘野口美佳是Kenny的好友，Suki說：「我今日身上都係着呢個牌子嘅內衣，仲送5位數字嘅內衣畀我，連我身邊朋友都受惠。」可會穿透視內衣給老公作驚喜？她說：「我接受唔到，內衣主要係肉色同黑、白色為主。」
採訪、攝影：曾小嘉