羅傑承旗下嘅BMA最近同台灣種子音樂結盟，種子嘅台灣歌手吳克群、瑤瑤同溫嵐等，就同曹格及周麗淇等變咗同門師兄弟姊妹。不過有傳吳克群同曹格爭寵，早排兩間公司喺澳門舉行結盟活動，吳克群以病為由甩底，辣㷫老細羅傑承。
事後吳克群知衰，前日佢嚟香港出席羅太梁芷珊嘅生日會，乘機向老闆負荊請罪。前日下晝吳克群現身圓方商場揀禮物，先去LV買個6,400蚊嘅銀包，再去童裝店買啤啤熊同玩具狗送畀羅傑承嘅囡囡。
曹格人唔到聲到
其後吳克群去羅傑承嘅山頂寓所開P，羅傑承見佢耍晒冧，都唔再計較。曹格就因為工作缺席，惟有透過電話祝賀羅太。
羅傑承夫婦同吳克群、周麗淇、周國賢及陳貝兒等玩到癲，屋企開海味店嘅周國賢仲嚴選靚鮑贈羅太。羅傑承除咗請魔術師同DJ捽碟表演外，又請南蠻亭及Cova嘅大廚到會㖭。