今日七月一日，例牌有遊行，劉慧卿最近頻頻被疑似社民連嘅年青人士「問候」，睇到不知是否真假的網上「強姦」恐嚇，照樣無畏無懼，今日一於跟隨民主黨參加遊行。睇吓點，唔係真係有人會衝擊民主黨呀？討厭民主黨與中央達成政改方案妥協者，大不乏人，好多人話對民主黨失望，但左丁山亦聽到沙田選民聲言以後會支持劉慧卿，不投「泛民」（如果呢個名詞仍然有效嘅話）。嗱，呢日就收到一位讀者Rebecca電郵話：「IamoneofTaiPoresidents,willvoteforEmilyLaudefinitely」。左丁山敢大膽預測，卿姐到了二○一二年立法會選舉，會成為新界東吸票機器，更特別會成為女選民偶像。當然，講政治，一個禮拜已係長期，兩年後事情，誰敢咬實？
最快選舉之期，就係明年底區議會選舉，係民建聯/工聯會與民主黨/街工/職工盟之第一次政改後大對決。社民連與公民黨在社區素來冇乜組織，在明年區議會選舉，即使想加入爭位，並非容易，因為區議會選舉嘅選區細，候選人倚賴組織支持或平時嘅街坊關係、大廈/屋邨業主委員會支持等等，並非純粹講政治。
區議會在二○一二年有五席變相直選議席，佔新立法會議席百分之七，具戰略重要性，係兵家必爭之地，民主黨如果慘敗於民建聯/工聯會之手，即是「改良方案」為他人作嫁衣裳，自己播種，他人收割。何俊仁、李永達等人，當然知得多過我哋好多，作為溫和民主派支持者，希望佢哋不可掉以輕心，全力以赴。
在任何民主社會，政治妥協係家常便飯，好似克林頓咁，佢做總統之時，參眾兩院由共和黨把持，如果克仔唔係談判、妥協高手，點會做總統做得有聲有色？現在民主黨控制白宮及參眾兩院，佔盡多數，但奧巴馬仍然要與共和黨人達成若干妥協先至可以推行佢嘅改革。香港政治過往習慣對抗，僵硬，互不相讓，於是政府做事往往夾硬嚟。今次政改有對話有妥協，民主黨俾人鬧，事屬平常，最大之民意測驗，係2012年立法會選舉，到時方見真章！