做開民主派「龍頭大佬」嘅民主黨，因為政改一役俾其他民主派猛烈批評，今日7.1遊行，相信要飽受不滿佢哋支持政改方案嘅市民指摘，自知惹眾怒，民主黨自願行隊尾，不過呢個安排仲易出事，事關社民連向來鍾意守尾門，將兩黨放埋一齊，恐怕未行出維園，白鴿已被熊熊怒火燒到燶。
民主黨決定罵不還口
民主黨李華明透露，黨高層已向黨友、支持者發出最高戒備警示，今日遇到任何指罵，不論如何猛烈、惡毒，總之罵不還口，始終大家係爭取民主路上同路人，無謂動輒對罵，俾其他市民見到，對民主運動百害而無一利。
義無反顧投政改支持票嘅李華明稱，預咗今日遊行充滿挑戰性，笑言會帶埋太太上街，希望針對民主黨人士見到佢與太太同行，唔好咁重手追擊佢啦。遊行要私家保鑣隨行，民主黨員唔知會唔會慨嘆何必當初？其他唔同另一半一齊遊行嘅民主黨議員，可能要帶備砂煲、易潔鑊，充當頭盔隨時掩護重要部位。
之不過黨主席仁哥應該冇有怕，自從佢喺中環遇襲，被人扑爆頭之後，黨內外同享「鐵頭仁」稱譽，相信今日出嚟行，唔係要威，亦唔使帶頭盔。其實民主黨人今日遊行最應該帶嘅唔係老婆或頭盔，而係一對耳塞，因為據講有人準備咗一萬支小vuvuzela魔鬼喇叭沿途派發，總之今日乜都唔使講，誓要吹爆民主黨。
mailto:[email protected]