無綫劇集《談情說案》俾人話抄襲日劇《神探伽俐略》同《Mr.Brain》，但收視仍然有好成績，仲成為今年到現時為止，無綫最高收視嘅劇集，上周五播出嘅大結局平均有38點（約242萬觀眾收看）、最高收視則達42點（約268萬觀眾收看）。一班演員林峯、楊怡、馬國明同廖碧兒等，噚日喺將軍澳出席祝捷會，遲到半粒鐘嘅林峯即席重演向楊怡求婚嗰一幕。
林峯傷手遲大到
對於無綫最近重播《神》劇，楊怡話：「咁寸！我真係唔知重播，等我有時間都睇吓先，總之家《談情說案》圓滿結束，我就放下心頭大石。」
問楊怡會唔會擔心觀眾再次將兩個劇嚟比較，如《談》劇開拍續集怕唔怕再被指抄襲？楊怡就話：「《神》劇咁夜播，啲師奶瞓咗o架啦！同埋可能開續集時係日本抄我哋呢！」林峯就話：「唔驚，一開始已經有人話我哋抄劇，我當時都叫佢哋睇埋落去先，我哋身為演員都喺角色上有調節到。」林峯又解釋遲到原因係朝早做gym時拉傷手臂肌肉要去睇醫生。佢仲話錄完《勁歌金曲》，夜晚會去無綫高層樂易玲生日會。