一年一度回歸授勳名單出爐後例必有爭議，今年都唔例外，最多人談論嘅可能係有「煲呔針」之稱嘅大班鄭經翰獲頒金紫荊。「十點前特首」獲此勳章，有人覺得實至名歸，另一前名嘴黃毓民則指大班幫煲呔塗脂抹粉，因此獲回報。
大班聲稱獲勳章同做議員或所謂「煲呔針」無關，純粹表揚佢有份創立長者安居服務協會，推廣平安鐘服務，14年來累計救咗400萬人性命，係社企典範，頒金紫荊畀佢，其實同時表揚協會成就，唔係佢個人榮譽。
協會為長者而設嘅一線通隨身寶服務，上月喺荷蘭阿姆斯特丹獲世界資訊通訊與服務業聯盟，頒發環球資訊及通訊科技卓越成就獎，可以話為港爭光。新當選委員會主席嘅大班更同一班幕後功臣去領獎，今年10月由佢老友親自授勳畀佢，就更高興啦。