政治無永遠的敵人，也無永遠朋友，因公投結盟嘅社民連、公民黨分別派出「馬草泥」任亮憲同司馬文（PaulZimmerman），想去角逐南區區議會薄扶林選區補選，由於協調不果，兩黨可能會搞一次「雙馬辯」，再進行遴選，邊隻馬跑出，暫難估計。
老外參選似乎輸蝕啲
司馬文參選經驗豐富，可惜回歸後選民愛同聲同氣，老外參選似乎輸蝕啲，不過薄扶林多中產，弱點變優勢；反觀社民連被覺得太激，馬草泥孭呢個包袱未必有着數。
馬草泥決意從政，稍後可能會晉身社民連領導層，因為社民連行政委員會有委員辭職，要補選填補空缺，據知馬草泥有意去馬，若成功當選，喺黨內更上一層樓指日可待。