新民主女神像係惹火尤物，估唔到今次都惹嚟幾個男士為佢駁火。
唐唐噚日以政務司司長身份去信立法會內會主席劉健儀，翻舊賬指日前立法會食物及環境衞生事務委員會討論食環署沒收民女事件時，社民連黃毓民鬧官員係「狗官」，冒犯官員，主持會議嘅民主黨肥仔明竟然冇處理。唐唐警告話以後若再有類似「狗官」事件，官員會離席抗議。
被點名批評嘅肥仔明承認處理手法有檢討之處，不過小組主席冇權趕人走，而為咗當日會議繼續進行，所以未有裁決；既然唐唐高調要求處理，內會稍後都要討論今次事件。
黃毓民懶理唐唐批評，強調議員天職係監督官員，官員鍾意拉隊走人悉隨尊便，總之目前已有《議事規則》規範議員言論，反駁根據唐唐標準，林D9發言指政黨要「良禽擇木而棲」都有侮辱性，社民連三子也可拉隊走人。