雖然小妹唔係匿埋喺屋企打機嘅宅女，但都好鍾意玩任天堂嗰隻遊戲《孖寶兄弟》（MarioBros），貪佢啲公仔得意，玩法又唔複雜，但係最唔like佢出咗25年，都冇中文版（sorry，小妹24歲咋）。家好多電玩公司都重視香港巿場，不斷出中文game。任天堂都算知機，終於喺呢個星期六（7月3日）推出第一隻中文版《孖寶兄弟》，佢哋嘅老竇宮本茂噚日飛咗嚟香港力撐新game，仲同兩個仔正式改咗個中文名叫瑪利歐兄弟喎。
加強玩家互動
宮本茂同小妹猛咁道歉，話佢哋好重視華文巿場，以前任天堂只出日文、英文同歐洲版遊戲，家會全力推中文版，「我以前也玩過英文遊戲，真係唔知講乜，只係不斷㩒掣，將遊戲本地化確實增加趣味。」
宮本茂話瑪利歐兄弟喺1985年推出，嗰陣只有三個動作，發展到呢個全新中文版本《新超級瑪利歐兄弟Wii》真係不可同日而語，畫面立體感強咗好多，仲由從前一人玩，升呢到家四人同一時間玩，大家可以互相幫忙過關，「新遊戲嘅重點係一家人可以一齊玩，藉遊戲加強互動溝通，有埋中文字大家明白好多。」
小妹即場試玩，新game唔單止可玩4P，仲有好多秘密武器，可變身會飛嘅螺旋槳瑪利歐，或者會滑水滑冰嘅企鵝瑪利歐。宮本茂教路，新手利用泡泡包住身體就唔會死，又有新增遊戲示範過關。
電郵：mailto:[email protected]