當28歲的莎蓮娜仍在網球賽場上打拼，周四出戰溫網女單4強對姬維杜娃時，大她一歲的前俄國美女鼻祖古妮高娃，卻已退役7年，周二重踏溫網草地場上，被問到會否復出，靚樣依舊的古妮高娃說：「體能上，我想已無可能重返球壇。」莎蓮娜及古妮高娃見證了「人各有志」這句話。
享受沒有壓力比賽
29歲的古妮高娃周二在溫網夥拍前「1姐」希姬絲亮相雙打表演賽，前者仍然令人眼前一亮，同樣的長辮、純白的戰衣、恰到好處的體態，難怪吸引4,000名球迷入場觀看，亦被傳媒冠以「辣妹組合」給這對「古希配」，兩人亦不負眾望，以2:0擊敗英國組合。
03年退役的古妮高娃續稱：「我已不年輕了，相信今次是我最後一次來到溫布頓，我只想享受沒有壓力下的比賽。」同齡的希姬絲也否定再復出的可能。
莎蓮娜4強鬥手下敗將
說回將於周四上演的女單4強賽（見附表），只有衞冕的莎蓮娜有晉身溫網4強的經驗，她亦是4人中年紀最大的。莎蓮娜與20歲的對手姬維杜娃曾於今年初澳網64強對壘，當時莎蓮娜勝2:0；另一組4強賽由前世界第5的施禾娜莉娃對比朗高娃，預計此仗勢均力敵。（now671台今日7:00pm直播）文：莎莉
《花絮》
「鐵人」紅爆任美職棒開球禮
今屆溫網第一周比賽，出現咗場超過11粒鐘嘅世紀超長戰，勝方（第5盤以70:68勝馬亨）嘅「鐵人」伊斯拿（圖、JohnIsner）返家鄉美國後即刻變咗大紅人，頻頻亮相公開場合，繼周一應邀出席名嘴DavidLetterman嘅清談節目後，周二又到紐約洋基體育場主持美職棒聯賽嘅開球禮。
李娜發嬲記者呆晒
中國「1姐」李娜喺場上大板大板咁打波時，樣子都幾強悍，場外對記者都幾友善，有問必答。但周二喺女單8強輸咗後，入到記者室嗰時，被問到係唔係心態問題而輸波，可能篤正佢死穴，佢就發嬲咁回應：「為咩輸波就係心態有問題，贏波就係心態好喎？場上係不停變化嘛！」呢個答案令在場記者都呆晒了。
梅禮媽咪助英隊打台盃
梅禮媽咪Judy（前）唔係少嘢！除咗日日陪住未來新抱仔施雅絲（後）喺球場為兒子打氣外，曾經係蘇格蘭網球隊教練嘅Judy，被英國台維斯盃新任隊長史密夫睇中，事關下周英國會喺伊斯特本主場對土耳其隊，史密夫想Judy幫忙分析土耳其主將MarselIlhan嘅強弱點，希望有佢幫忙，可以贏波，美中不足係囝囝梅禮因撞期而無緣參加今屆台維斯盃。
