明天就是七月一日，一年已過了一半，以往左丁山係打工仔之時，七月、八月就係放假之時，曾經試過幾年成個八月份都在東南亞嘅小島渡假，享受陽光與海灘，但自從成為自僱人士之後，每個月好似過得特別快，眨吓眼又要交租、交雜費，邊度有時間去外地放假一個月呀？
放假在海灘、泳池旁邊，懶洋洋，讀乜嘢好？唔會讀奧巴馬嘅《TheAudacityofHope》，更唔會去啃格林斯潘嘅《TheAgeofTurbulence》，最好就係揸住本余光中詩選與一啲間諜小說交替閱讀。讀詩可以洗滌腦筋，讀間諜小說可以令我哋知多啲呢個世界嘅殘酷現實，唔好儍儍地太過天真做人。著名英美暢銷流行小說作家有好多時間及經費做資料搜集、背景研究，寫小說情節雖然純屬虛構，但間諜鬥智之手法、手段及政治現實，有其所本，唔係亂咁作嘅，讀過十零本就知道英、美、法、以嘅情報機關嘅手法，雖各有不同，現實則一，就係為咗保護本國安全與經濟利益，可用盡權謀。
六月二十三日《蘋果》A32版報導胡錦濤身邊嘅韓語繙譯張留成受南韓收買，向南韓洩露中共與金正日會談機密，已被處決。政治間諜往往潛伏在領導人身旁，最受信任的人可能就是敵人的間諜。同日《文匯報》內亦有一段間諜故事：「按住蔣介石脈搏的人」──記中共史上最牛女諜沈安娜。沈女士生於1915年11月，1932年在上海讀中學結識中共黨員華明之，1935年成為地下黨員，加入國民黨為速記員，因沈安娜專攻速記，每分鐘可記二百字，且字跡靚，於是好快就一級升一級，1938年受周恩來、董必武指派，加入國民黨浙江省政府主席朱家驊部下，得朱信任，推薦做國民黨中常會蔣介石主持嘅會議做速記員，一路去到1949年共產黨大勝，沈安娜先至悄然離開南京，加入中共嘅國家安全局。在任十一年間，國民黨中常會頭等機密，全部流入中共手中，國民黨猶懵然不知，內戰失利，自有其必然。呢位沈女士在今年6月16日逝世，台灣嘅國民黨裏面，今天有冇三幾位沈安娜呢？搞政治，不是純粹嗌吓口號，講吓甚麼理想或是謾罵他人！