自強婦：將怨恨終結
她守住秘密70年，希望怨恨在她這一代終結。鄧李少萍，洋名Nancy，今年76歲，小時候父母離異，媽媽覺得她「腳頭唔好」，爸爸覺得她長得像媽媽「篤眼篤鼻」，對她「打多過食飯」，「佢當差嘅，放工支槍可以唔使擺喺槍房，一返到嚟用個槍頭扑我。」
Nancy好學，在澳門生活時每次買完豆豉，就拿着包豆豉的報紙在廁所偷偷認字，趁父親出更時到土地廟的「卜卜齋」，「佢知道咗，唔鍾意我讀書，鎖起我」。平日也毒打她，「有次喺二樓一腳踢落樓梯，嘔血，阿婆畀支藕我，話可以索血。我當時諗，唔得喇，咁打法點頂，就自己走出去，自己養自己」。
離家後她嫁了給當藥劑工作的丈夫，丈夫在香港上班生活，六個孩子由她一手帶大。
童年經歷至今仍是她的夢魘，直至黃慧貞及蔡寶瓊三年前構思《華人婦女與香港基督教口述歷史》，她才第一次盡訴心聲，「我唔同仔女講，因為我唔想仇視落去，一代傳一代，所以我同先生50幾年結婚我都無講。我好多謝佢哋嚟訪問我，等我有機會講出嚟。」
童養媳：寧願一個人
每個人都有一個價，一個16歲女孩值100元。陳義妹今年79歲，是廣東惠陽人，年幼時父母雙亡，她被姐姐以100元賣給別人當童養媳，嫁來香港的荃灣楊屋村，「嗰時嚟到咪耕田、養豬、種菜囉，佢（丈夫）咪返學囉，都唔知係嫁畀佢，佢都唔知係會同我結婚」。
「嗰時家婆成日鬧，我做工就有飯食，唔做就冇飯食，我病咗，太婆（丈夫的祖母）話要睇醫生，唔係冇人做工，我家婆就唔高興。」婚後兩年，她誕下長子，丈夫卻一走八年，去如黃鶴，她想過逃走，「佢哋話個仔喺度，你唔准走」。
家裏拮据，她跑到紗廠工作幫補家計，那段時間最快樂。「嗰時好好呀，啲工友好好，個個都對我好，有人同我傾偈。」
後來丈夫回到她身邊，她再誕下三個兒子，孩子對她的「童養媳」身份一無所知，「四個仔學晒阿爸啲嘢，唔幫手做嘢，有得揀梗係生女啦」。到今時今日，她的丈夫仍然是飯來張口，要她服侍。義妹說，如果有選擇，寧願不結婚，一個人生活，「唔使服侍咁多人吖嘛」。
地主女：終獲父認同
蘇丹雲由二奶所出，雖然家境富有，但地位低微。一家人住在大屋中，她和姐姐被「放逐」到另一間小屋分開住。父親對她不算愛錫，直至土改一役，家破人亡，爸爸才知這個女兒好，「爸爸係地主，我地主女，要做好多苦工，做埋阿哥家姐嗰份，爸爸年紀大，無辦法出去做嘢，咪等我做晒啦」。
後來批鬥越來越激烈，兄姊全部不認父親，只有她不肯離開父母，「阿哥家姐做幹部，同我哋劃清界線，阿爸頸骨都俾人打斷晒，成個下巴跌晒落嚟，總之好肉酸，佢同我講：『女呀女，第日有好環境，我對你另眼相看。』我好開心，因為爸爸從來無開口讚人，爸爸終於錫我，知道我好」。
「卒之一個禮拜裏面阿爸鬥死、阿嫲嚇死、阿嬸又跳海死，嗰時無人幫我，自己去執屍，淨係准用蓆包住，驚到唔識驚。」
為撇開「地主女」身份，她由順德搬到廣州，認識了後來的丈夫，來港生活，開始了教學工作。丈夫晚年患上糖尿病需要截肢，她全心照顧，至他去年底離世。記者張嘉雯
