《N3II》風雲上身 喪斬千軍

《N3II》風雲上身 喪斬千軍

唔係連《風雲》都出Game嘛?估錯晒!呢位貌似聶風嘅仁兄,原來係《Ninety-NineNightsII》(N3II)嘅男主角GALEN先真!記得喺兩年前推出第一集嗰陣,已極受動作遊戲迷歡迎;嚟到第二集,唔單止追加過百項特殊絕技,仲要你將空群而出嘅妖獸一Q清袋,唔再玩單挑咁悶,千人亂斬,熱鬧過老蘭!

記者:陳國輝

人叠人 癲過無雙

講到最熱鬧ActionGame,唔使講梗係KOEI無雙系列啦!鍾意三國歷史嘅死忠Fans,一定撐佢!但計我話,如果你想享受吓一騎當千嘅快感,就要試吓玩呢隻《N3II》;佢除咗繼承上代採用大規模戰鬥系統外,最過癮係班小嘍囉仲會俾你打到飛起,遠到連畫面鏡頭都追唔到,勁爽快!
作戰版圖亦會出現唔同嘅地形,例如以城堡作掩護,玩家須根據各種特性,去配合你嘅戰鬥策略;即係話,唔係一味死衝死撞就打贏o架!動作Game少不免會有暴力同埋血腥元素,《N3II》亦唔例外,除咗一刀一鮮血,血漿仲唧到畫面四周圍,如果有小朋友喺隔籬,最好咪亂開嚟玩喇。

■呢招魔法會成個人衝埋去,勁華麗!

■劈友時似足玩緊激光槍,仲有成束光。

■打大佬梗要結合幾種魔法先搞得佢掂。

■360度一劍劈晒,十萬個圍住都未驚過。

㩒個掣 即出魔法

如果你以為佢係《無雙》嘅影子作品,咁就大錯特錯!講熱鬧,呢隻Game的確攞滿分,但所謂嘅故事背景,又係重複以種族嘅鬥爭為主線,毫無史實根據,好科幻嘅年代,搭上好科幻嘅劇情,當佢RPG咁玩實悶親你,都係當ActionGame好過!動作系統係重要賣點,你唔止能一個揪幾百個,仲可以施展不同魔法,加埋有百幾款咁多;至於點先學識,梗係要邊打邊累積經驗啦,特別一提係,如果你唔熟習《N3II》嘅出招方法,其實佢提供咗㩒一粒掣出招嘅超低能玩法,可以話入門級玩家隨時都變成劍聖,不過都係嗰句,咁打法就算爆咗機都無快感囉!

■唔講以為係步驚雲攬實孔慈屍首嗰幕,勁神似。

■呢一劍打到班友仔彈起,似唔似升仙呢!

■面對高自己幾倍嘅巨獸,唔Call人幫手點得!

玩連線 合作打怪

除空群出擊嘅小嘍囉,戰鬥中梗唔少得要把關嘅巨型魔獸!《N3II》查實都唔少,想一支公擊敗佢,話易唔易!如果真係搞唔掂,不如搵Friend幫拖仲好,遊戲提供Online合作模式,唔係互揪,而係合力對付大佬,不過佢最多只支援二人同時作戰,或者你覺得人丁係單薄啲,但總好過成班友圍恰一隻Boss咁無品!

Profile

機種:XB360
發行:Konami
類型:ARPG
人數:1-2
發售日期:7月1日
價錢:$399