「佢條腰有無22吋呢？」「混血阿妹細細粒，跳得好高！」剛到沖繩著名的Actor's，9個廿歲出頭的導師已在排舞室等我們，個個笑容燦爛，長腿瘦腰人勁fit，暗瘡一粒都無，同日日上網打機瞓覺都仲係熊貓眼的宅型少艾差十萬八千里。點解當日十零歲的我，只識撻喺床睇《澟》漫畫，唔起身跳兩part舞？！
記者、攝影：陳慧敏
鳴謝：新華旅行社
日本偶像舞蹈學府
在日本，沖繩除了表示陽光與海灘，就係窮鬼的鄉下地方。今日，或者多咗個，係跳舞好勁的地方。沖繩人生活從來簡單，除了種田捕魚，就是同friend彈三線琴，唱歌跳舞過日辰。所以日本人都相信，沖繩人的節奏感已溶於血裏，是天生表演分子。
Actor's你未必聽過，但肯定知道沖繩出身的歌手都唔好惹。今日都仲有一番地位的安室奈美惠、昔日的Speed四個、去了台灣做主持的千田愛紗都在此被睇中，那些偶像事務所他們豈不是常來揀蟀？攞定簽名有着數喎？負責人：「是，演藝圈的人確是常來，但望被星探發掘做明星的人其實不多，學生多數寧願加入舞台劇，做排舞老師或做幕後，出路多得很且更專業。好過做星，一百個出去都未必有一個紅得起。」明星跳舞學校以前仲有好多學生專登輟學，全職學舞。現在學校跟島上的國際學校合作，學生繼續讀書，同時日日來上堂，為未來鋪路。
3-70歲都學得
「我們由最基本的開始吧！」我們的導師由18-22歲，但多數7、8歲就來上課，到今日起碼練舞7-10年了！入學頭幾堂乜都唔教，淨係學Un身Un勢。吓，Un腳？我好熟啦！我一掌推了Liz出去上堂，自己躲在後排氣聚丹田大髀收緊UnUnUnUnUnUnUn。原來全身Un個五分鐘，腰肚大髀都無力！剛開始學舞的Liz話：「在香港學舞多數目標為本，一隻一隻歌排好俾你練，唔練十年八載，俾首新曲你真係會唔識跳。相反這裏淨係教你讓身體跟住節奏郁，完全無譜，基本功打得好，追住音樂已識扭，以後學乜都易好多！」學校收生限制4-22歲，學費每月21,000日圓（約$1,830）。但參加旅行團就3歲到70歲都得。
a.Actor's
地址：宜野灣市大山六丁目3番3號
網頁： http://www.actor-s.org
啤酒一日大學
繼續暑假遊學團！既然有靚水，沖繩啤酒都好出名。Orion啤酒廠都辦了一日大學，第一堂課，釀酒過程你或看了瞌眼瞓，然而如何嘆一杯靚啤酒？例如啤酒杯只可風乾不可抹乾，啤酒溫度要在6-8℃最好味，或者啤酒同泡停在3/7分界是為美味黃金比例你又知唔知？學「海」，果然無涯呢。
b.オりオンビール名護工場
地址：名護市字東江2-2-1
網頁： http://www.orionbeer.co.jp
街市早餐：C朗吞拿魚開邊
有一件事，我趁沖繩之旅最後一份稿，攝位都要寫。就是晨早去Lyumachi魚市場食早餐！我知道，這已是旅客們的指定行程。魚市場晨早6時最多人，街坊7點半就去買餸煮飯。放假嘛，餓過龍的我們8點半才到，市場幾乎已收檔。隔籬街還有一兩檔在鮮炸墨魚，買完一轉隔一陣又收檔。好在預約了的阿伯留了條重磅過C朗好多的巨型吞拿魚等我們。老闆一句：「易箍唷！（開始啦！）」手起刀落，批頭批尾左一刀右一刀，將滅火筒咁大條魚開邊，片出魚腩，分出幾十碟任食。自己來的話，在這裏買魚腩一般約$90一大碟，都有成三十多件。我們旅行團特別安排，切一條巨型吞拿魚任食。入口果然鮮香味美，食到個個吽吽哋時，老闆：「介紹你哋我最鍾意的食法！」捧出大支沙律醬將魚生完全掩蓋，魚生變了白色一嚿雪米糍，女團友嚇呆：「吓，咁肥？」食落，滿嘴沙律醬！看見嘴歪的我們，老闆無端端哈哈笑：「你班人淨係食慣醬油呀！魚生仲有好多食法o架！」
c.Lyumachi魚市場
地址：那霸市港町1丁目1番地
平食放題：$260蟹鍋
要方便shopping，當然最好住國際通。我們住的其中一家StationMakishi酒店就在國際通的盡頭，企企理理，又唔貴。而且頂層的Clife餐廳，有270度落地大玻璃，可以邊食飯邊望到那霸市的夜景。餐廳提供的地道沖繩菜式也多，還有抵食海鮮火鍋，最近推出的蟹鍋限時套餐，60分鐘裏有蟹粥、蟹湯、蟹壽司、蟹春卷等，每位$260起。如此價錢如此質素同環境，又好抵喎。
d.StationMakishi
地址：那霸市安里1-2-25
住宿：酒店住宿每晚每日約$740起
網頁： http://www.hotel-makishi.com
TravelMemo
持BNO或特區護照免簽證。日本領事館：25221184
新華「沖繩日語、舞蹈、空手道8天體驗之旅」（JASB08SD），團費$19,888起。新華旅遊：27222888
100日圓約兌8.7港元（文中價錢已折算港元）
100V，兩扁腳插座
Dance!Dance!Dance!
溫馨提示：
Lyumachi魚市場隔籬樓梯上2樓就是熟食中心，有日式同中式料理店，揀好海鮮，上樓就可以煮來吃。
日本 沖繩
下周有雷雨，27-29℃
