我諗對車略有認識的人，講起豐田的皇冠（Crown），總會聯想起─的士。算我膚淺，我亦有此想法，直至這部頂級兼限量版CrownAthlete+M擺喺眼前，突然知道車都可以返老還童，老派感覺一洗而空，換來的，是充滿青春氣息兼霸氣，原來皇帝都可以轉形象。
記者：趙慧敏
攝影：梁細權
Model：Brigida@Zmodel
老的變霸氣o靚仔
千祈咪以為老實穩重的Crown只係做「老的」，話晒係「皇族」，又點會咁低層次，呢架CrownAthlete+M更加唔係普通貨色，而係Crown家族裏面個頂級版，而且仲係限量生產，喺香港真係搵多架都難，簡直就係太上皇。單睇外形，過往老氣橫秋的印象一掃而空，取而代之是充滿霸氣的格調，與霧燈一體式設計的頭唇，充滿房跑味，加上微微上翹的尾翼，凸出其雄渾的車身，設計偏近方形的雙出式排氣喉，望落都知惹佢唔起。而尾燈燈組都經過精心改良，渾圓的煞車尾燈以電鍍包圍，搶眼到暈。
外形無論點跑點惡，點都要保住豪氣，車櫳以真皮及仿碳纖做主打裝飾，又有導航系統、全方位式鏡頭等，邊架車挨近你，都睇得一清二楚。不過坐得Crown，舒適享受總係要排頭位，座椅用上高級皮料，柔軟度啱啱好，前座還配備冷暖座椅按鈕，冬暖夏凉，貼心到不得了，後座還兼備座椅高低調控，老闆坐喺後面，一樣享受到。
三環式TFT錶板
講明頂級限量版，當然唔會喺車形上整色整水就過骨，+M版絕對係Crown高性能代表，在Crown車系中唯一採用Supercharger，加上3.5公升V6引擎，有360匹馬力，拍得住歐洲房跑性能。由於車身較上一代明顯修長，置身其中，絕對沒有累贅的感覺，而且望見電子式TFT錶板換上三環式設計，帶來跑味之餘，行車數據及耗油量等資料亦一目了然。為兼顧乘坐房車的舒適以及跑車速度感，行車時可選擇ECO及SPORT模式，可以因應不同環境選擇操作模式，行車狀況任你選擇。
CrownAthlete+M規格
引擎：3,456ccV6
馬力：360ps/6,400rpm
扭力：498Nm/3,200rpm
傳動：6速自動波
售價：$998,000
查詢：61269304（中華汽車）