港產太子黨又被欽點上位，特首煲呔噚日公佈委任海濱事務委員會成員，首任主席係老外測量師蒲祿祺，其他成員除咗多個官方代表，仲有八名個人成員，當中包括幾個富豪第二代，比較出名嘅有霍震霆次子霍啟山，佢出名在曾經同影星章子怡拍拖，據講近來感情生活好dry，做吓公職，正好填補多餘時間。
另一個富豪之後係香港興業查家查耀中，現任家族公司總經理兼業務發展總監，去年底獲委任做方便營商諮詢委員會委員。其士集團周家大小姐周莉莉亦榜上有名，周莉莉已有幾份公職在身，咁受器重，隨時成為新一代公職女王。海濱事務委員會就所有海濱事宜向政府提意見，目標促進及推動維港兩岸海濱發展，塑造世界級海濱讓市民享用。