運輸署噚日公佈7月11日傳統車牌拍賣名單，280個牌入面，最特別嘅係一個無字頭8964車牌，呢個牌都出得街，可見運輸署真係無政治審查，堪稱公務員政治中立嘅典範。
根據法例，市民可向運輸署申請未出街嘅傳統車牌出嚟拍賣，由於8964無字頭車牌唔屬於所謂「舊有系列」，所以唔使畀1,000蚊按金就可以勾出嚟，申請需時大約半年，底價則拍賣當日即場公佈。運輸署規定呢個牌不得轉讓，但如果用公司名義買入，轉股東則不受限制。
陶君行嫌棄「D0NALDPK」
8964對香港人係非一般數字，生命中不能忘記嘅「密碼」，據八方了解，唔少有心人對呢個牌都好有興趣，身兼支聯會常委嘅社民連主席陶君行表明有意到場舉手，佢話自己財力有限，出價最多5萬蚊，至於會唔會代社民連出價，佢話暫未討論。
長毛曾自訂「CYUSH0」、「D0NALDPK」車牌，陶君行透露長毛本來想將「D0NALDPK」車牌送畀佢，不過佢覺得「好核突」所以婉拒。長毛則話8964車牌唔係佢勾出嚟，佢亦無意競投，「留番畀有心人投啦。」
估計底價可高達15萬元
計八方話8964車牌由支聯會買入最合情合理，副主席蔡耀昌話由於支聯會冇車，就算投得車牌都冇用；另一副主席李卓人話可以考慮，因為呢組數字實在太有意義，佢會提出喺常委會會議上討論應否競投。阿人又話佢架車個牌數目字係7964，出車時由運輸署隨機編配，對於一字之差，一直覺得好遺憾。
118專業幸運車牌公司負責人陳先生稱，無字頭車牌向來矜貴，估計8964底價達15萬元至16萬元，成交價最少20萬元，暫未聽聞行家有興趣買入再轉手，「呢個牌太敏感，相信都係政治人物投嘅機會較大」。8964車牌7月11日星期日上午9時25分喺灣仔會展L4樓S421會議室舉行拍賣，有心人記得帶齊文件同支票，詳情可睇運輸署網頁。
mailto:[email protected]