李老闆：喂，經紀陳，做咩心情咁靚呀？又有斬獲呀？
經紀陳：都係多得巴西同荷蘭啫，兩支名牌贏波咁正路，買咗2串1W同埋半場兩隊W互串，收咗兩注飛。
外賣仔：咁就食好啲喇，一於鋸扒慶祝吓，鑊仔牛柳啱唔啱？
車神：經紀陳，半場W2串1你都敢買，好博喎！我就慘啦，買咗兩隊[-1]「主勝」串埋一齊，點知俾斯洛伐克補時咁都博到個12碼，搞到我一早斷纜，真係O晒嘴。
戰神：我同你嘅命運差唔多，諗住荷蘭2:0個波膽執硬，咁都要喺褲袋度跌番出嚟，吹脹！
經紀陳：講開呢兩場波，我睇番足智彩個孖膽投注額都幾犀利喎！成二百幾萬，但係兩個波膽都咁正路，派得嗰三千幾蚊。
戰神：其實個世界盃孖膽幾受歡迎o架！我見投注額一次高過一次，之前都係百幾萬，呢次去到二百幾萬，好多人都想以小博大；就好似早幾日英、德嗰場，爆個4:1冷波膽出嚟，結果一注5蚊派成百幾萬，好過買六合彩。
李老闆：荷蘭同巴西喺8強碰頭我就最開心，話晒兩隊喺世界盃交手次次都精采絕倫，最緊要係禮拜五開早場，到時我間茶餐廳唔爆場都幾難。
車神：到時我就肯定泊低架搵食車，等睇好波。李老闆，留定個位畀我得唔得先？