一年一度嘅海洋公園夏水禮聽日又到喇，今年嘅水戰場係歷年最大，有成10,000平方呎，除咗平時嘅水戰場地之外，仲有啲「世界之最」嘅新增項目，小妹早排去泳衣店密密入貨，今次係時候去海洋公園騷吓身材。
今年夏水禮由7月1日玩到8月31日，最矚目嘅係高11米、長54米、世界最長嘅「極速摩天滑水梯」，但滑水梯有身高限制，冇106厘米都唔玩得。小朋友可以轉而挑戰輕量級高7米、長28米嘅「沖天滑水梯」，又或者迷你版嘅「樂天滑水梯」。
國家級跳水高手表演
其他新項目有「勁歌熱舞泡泡池」，大人玩得之外，都會有兒童版，入面不停放泡泡，有埋安全眼鏡提供，唔驚整親對眼，但係唔好擘到個口咁大，費事食咗啲泡落肚啦！想玩靜態啲嘅遊戲，可以去以海洋為主題嘅旋轉木馬「環迴水世界」，啲木馬換晒做13種瀕臨絕種嘅海洋生物，除咗海豚，連中華鱘都有。呢個旋轉木馬嘅直徑全世界最長，有81個位，玩一轉要4分鐘。再靜態啲可以去睇表演，今年有嚟自北美同歐洲嘅國家級跳水高手表演，由80呎高空跳落嚟，都咪話唔驚！
今年夏水禮嘅票價同以前一樣，大人250蚊，小朋友125蚊。預計今年有100萬至110萬人入場，比舊年增加一成。海洋公園仲推出咗350款夏日美食同精品，會考生同埋高考生只要喺7月1日到15日帶埋學生證去海洋公園玩，買小食套餐就會有買一送一嘅優惠。
電郵：mailto:[email protected]