呂良偉最近喺內地推出咗一本自傳叫《路是無限寬廣》，書中內容有提到佢過去兩段感情，一段係鄺美雲（Cally），一段周海媚，噚日有報道話阿呂本書講到當年同Cally拍拖幾個月，女方就心急逼婚。
報道話阿呂堅持先試婚，擺酒唔註冊，仲話據阿呂書中寫：「美雲開始是很激烈反對，但畢竟我們認識以來吵的架都多，便只好妥協。我鄭重向她做出承諾，只要兩人合得來，便去加拿大註冊。」
但婚後兩人經常吵架，最後阿呂提出分開，雖然Cally唔想，但越吵越厲害，阿呂話Cally最終都接受離婚，佢答應畀咗一大筆贍養費Cally，阿呂文中話：「我和鄺美雲的婚姻也在金融風暴來臨之後走到盡頭，儘管雙方沒登記，但是我不想虧待她一分一毫，在她要求下，我答應給了她一筆高昂的贍養費。」
「冇寫過有人逼婚」
馮仁昭噚日打畀阿呂，問佢係咪出書寫過呢啲嘢，佢話：「我人唔喺香港，睇唔到本周刊點寫，但朋友粗略有講畀我知，我覺得有人存心挑撥離間，咁樣寫法，Cally睇到當然唔會開心，因為我本書根本唔係咁寫，更加無寫過有人逼婚，你哋最好買本書嚟睇吓，其實我部書主要係講成長過程，感情係其中一部份，唔明點解有人要刻意放大呢部份，仲要抹黑我嘅意思。」