貿發局突然禁止o靚模喺書展會場舉行簽名會，小妹公司啲宅男、龍友同事都大表反對，緊接書展舉行嘅動漫電玩節當然要順應民意同書展唱反調啦。好似主要參展商之一嘅遊戲橘子（Gamania），趁今年成立10周年，組成近20人嘅o靚模兵團殺入會場，谷胸促銷佢哋全新線上遊戲《龍之谷》、《劍雨江湖》等，仲話預計生意額會比上屆升一成。
動漫節下月30日至8月3日喺會展舉行，Gamania噚日搶閘飲頭啖湯搵咗o靚模A.Lin、雷凱欣帶住一班師妹着住啲露背、露臍嘅10年紀念Tee行Catwalk，介紹最新遊戲，雷凱欣仲話新game《龍之谷》女角用咗日女配音，好「卡娃兒」。
身上件Tee送出去
Gamania銷售及業務發展部經理劉敏慧話，書展將o靚模禁足，相信令一班宅男轉戰動漫，所以會加碼安排o靚模到會場宣傳，陪機迷一齊打機，「o靚模着住嗰啲Tee到時會送畀機迷」。
Gamania研發部經理霍憲基話，10年前線上遊戲喺香港啱啱起步，到家發展到全球化，機迷要求亦越嚟越高，好似呢隻《龍之谷》角色扮演格鬥遊戲，唔單只講求打擊感，又要加入時興嘅3D元素，仲要加埋背景音樂同音效，畀機迷有現場一樣嘅感覺，「最新一代嘅線上格鬥遊戲，唔再係之前嗰啲㩒一個掣自己打，而係將玩家代入咗角色，透過操控、音效令機迷好似真係入咗去打嘅感覺」。
電郵：mailto:[email protected]